• Melchor, Gaspar e Baltasar recibiron as peticións do público infantil no Campo do Souto e agasallaron aos nenos con lambetadas e agasallos //
• O alcalde destaca o éxito da cabalgata e agradece a colaboración das persoas e entidades participantes que a fixeron posible //

Tarde máxica a vivida hoxe en Padrón. Expectación, nervios e moita, pero moita ilusión, era a que reflexaban os rostros das numerosas nenas e nenos congregados nas rúas do casco histórico de Padrón ante a chegada das Súas Maxestades os Reis Magos de Oriente. A cabalgata de Reis 2022, que recupera despois destes últimos anos a normalidade, foi todo un éxito de afluencia e participación. Veciñanza e visitantes contaxiáronse da maxia da noite de Reis.

Fieis a súa cita, Melchor, Gaspar e Baltasar, cada un na súa carroza, e acompañados dos seus paxes, fixeron a súa entrada triunfal na vila pola rúa Real, sementando ao seu paso a maxia e a ilusión.

A primeira parada das Súas Maxestades foi na igrexa parroquial de Santiago, onde visitaron o Belén vivinte e realizaron a súa tradicional ofrenda ao neno Xesús. A cabalgata proseguiu o itinerario previsto, recalando na Praza de Macías para, de seguido, enfilar cara a casa consistorial onde o alcalde, Antonio Fernández Angueira, acompañado de membros da Corporación municipal, recibiron aos Reis Magos.

Finalizado o encontro oficial, Melchor, Gaspar e Baltasar proseguiron o seu percorrido ata o Campo do Souto. Alí, na carpa instalada para a ocasión, os Reis Magos recibiron a todas as nenas e a todos os nenos que o desexaron. Entre risas e nervios, pero moi ilusionadas, as crianzas trasladáronlle as Súas Maxestades peticións de última hora e os desexos escritos nas cartas que lles enviaron. Melchor, Gaspar e Baltasar tomaron boa nota e, como adianto da noite máis máxica do ano, repartiron agasallos e lambetas entre o público infantil.

E, como cada ano, mentres agardaban a súa quenda, os nenos e as nenas puideron desfrutar do Carrusel de Cabaliños de Hernáiz, situado no Campo do Souto, completamente de balde, sempre que estiveran en posesión dos vales (ata tres por crianza) que permitían esa viaxe gratuíta.

Dende o Concello, o alcalde, Antonio Fernández Angueira, agradece a colaboración de todas as persoas e entidades que fixeron posible que a cabalgata deste ano fose todo un éxito.