-->

O Concello de Padrón pon en marcha unha campaña para promover o turismo de proximidade e reforzar a confianza do público

O Concello de Padrón vai poñer en marcha esta semana unha campaña para promover o turismo de proximidade e reforzar a confianza do público nun destino seguro, atractivo e libre de coronavirus. Unha iniciativa que inclúe a estrea da páxina web www.padronturismo.gal e a dunha nova marca turística, “Padrón, camiño e destino”, que promova as singularidades do municipio en turismo, natureza, Xacobeo, gastronomía, literatura e hostalería e comercio.

Trátase dunha proposta incluída no Plan de Reactivación do Turismo e do Comercio elaborado pola Concellería de Turismo de Padrón para os anos 2020 e 2021, tendo en conta o Plan de Acción Padrón 2017-2022. A concelleira de Turismo, Lorena Couso, explica que “o obxectivo é promover un turismo de proximidade e estable, procedente tanto da comarca como do resto de Galicia, e que nos permita así reactivar un pouco todos os sectores”. Unha iniciativa desenvolta polo Concello de Padrón con fondos propios e que supón un investimento de máis de 10.000 euros.

Nova marca turística


Entre os puntos fundamentais a destacar e poñer en valor de Padrón elixíronse seis, que figuran como marcas englobadas en “Padrón, camiño e destino”. Este identificador xeral representa os valores máis coñecidos de Padrón a nivel internacional: os pementos (que substitúen ao “Ó” do nome rodeados polas confluencias dos ríos Sar e Ulla), e o Camiño (representado polas liñas de entrada e saída da marca). O resto das letras da marca tamén teñen a súa personalidade e poñen en valor algún aspecto distintivo do municipio: o “P” toma a súa forma do caxato dos peregrinos; o “A” presenta un sorriso de amizade”, o “R” inspírase na inscrición da Pedronía”; e o “N” representan unha barca surcando os ríos da comarca.

As outras seis marcas englobadas en “Padrón, camiño e destino”, que manexa unha gama cromática verde para reforzar o seu vínculo co pemento, son:

  • "Padron Turismo", dirixida especialmente a un turismo de proximidade. A súa cor corporativa é a verde.
  • “Padrón Xacobeo”, cunha aposta pola potenciación da Pedronía e o valor patrimonial que xira en torno ao Camiño de Santiago. A súa cor é a amarela, de acordo coas frechas que guían o Camiño.
  • “Padrón Gastronómico”, para poñer en valor os produtos estrela como o pemento de Herbón ou a lamprea do Ulla. A súa cor corporativa será o laranxa, nunha tonalidade cálida.
  • “Padrón Literario”, coa potenciación da Ruta Rosaliana posta en marcha en colaboración cos concellos de Ames, Brión, Rois e Santiago. A súa cor corporativa é a das camelias.
  • “Padrón Natural”, representada tanto polo Xardín Botánico-Artístico como a práctica deportiva ligada a actividades coma o sendeirismo, o rafting ou a tirolina. A súa cor é a verde auga.
  • “Padrón Hostalería e Comercio”, dous sectores que xa formaron parte da primeira iniciativa de reactivación económica tras a pandemia (coa entrega de 115 biombos protectores de cristal templado, coa exención de pago de terrazas para establecementos hosteleiros, difusión da campaña #PadrónVolve a través das redes sociais, a campaña ‘Cultura na Rúa’ e a axuda á instalación de medidas hixiénico-sanitarias nos establecementos comerciais). Dous sectores que serán obxecto de novas iniciativas ao longo da próxima semana. O azul será a súa cor corporativa.

 Páxina web

Así mesmo, esta semana púxose en marcha a páxina web www.padronturismo.gal, para dar soporte a esta nova campaña promocional. Así, a web contén enlaces aos cinco bloques englobados en “Padrón Turismo”, así como un enlace á APP da Pedronía. A maiores, a páxina contará tamén cun apartado denominado “Experiencias”, no que expertos do sector recompilarán e porán en valor distintas actividades que se poden realizar en Padrón co obxectivo de que o turista poida vivilas en primeira persoa.

Ademais da información de eventos, comercio, gastronomía, turismo, natureza... o novo sitio incluirá un Marketplace, unha plataforma na que os distintos comercios de Padrón poderán anunciar os seus produtos e ofrecerlles un interesante abano de opcións ao turista que queira achegarse pola vila. “Poremos a disposición do noso comercio un formulario enliña no que poderán engadir fotos e información, que nós validaremos para a súa publicación na nova páxina web”, explica Lorena Couso.

 

PadronCaminoEDestino

Contacto

Pode contactar co Concello de Padrón a través dos seguintes medios:

  • Enderezo: Rúa Longa, 27 - 15900 Padrón
  • Teléfono: (+34) 981 810 451
  • Correo electrónico: correo@padron.gal

Outros sitios web de interese

 
 
App Padrn removebg preview
 
Descarga a App de Turismo de Padrón.
Top

Aviso legal - Política de privacidade - Política de cookies - Máis información sobre as cookies

Ligazón temporal á antiga páxina web

Este sitio web utiliza cookies para que vostede poida ter a mellor experiencia de usuario/a. Se segue a navegar está a dar o seu consentimento para a aceptación das mencionadas cookies e da nosa Política de Cookies. Detalles…