O Concello de Padrón presentou unha ampla oferta deportiva para o curso 2020-2021 cun estrito protocolo de seguridade sanitaria pola situación xerada pola pandemia da Covid-19. A vindeira semana, o 21 de setembro, abrirase a convocatoria de matrícula para as persoas que estean empadroadas no Concello de Padrón, e a partir do día 28 abrirase para todo o público. O concelleiro de Deportes, Ángel Rodríguez, explicou que “durante os últimos meses traballaron intensamente para organizar estas actividades e, sobre todo, para adaptarse a todas as medidas das autoridades sanitarias e as necesidades dos padroneses e padronesas”.

Así, o novo curso comeza con numerosas medidas hixiénico-sanitarias co obxectivo de protexer aos usuarios das escolas deportivas e das actividades físico-deportivas. No mesmo momento no que se realice a solicitude de matrícula, todos os usuarios recibirán as instrucións que deberán seguir no transcurso das actividades unha vez se retome a actividade. Recentemente, a Xunta de Galicia aprobaba a obrigatoriedade do uso da máscara nos ximnasios e espazos deportivos pechados.

As clases comezarán o día 5 de outubro e rematarán o 16 de xuño de 2021, en concordancia co calendario escolar habitual. Se ben, en función da evolución dos contaxios por coronavirus todas as actividades poden sufrir modificacións, de xeito que incluso cheguen a anularse en caso de que as autoridades sanitarias o indiquen. Do mesmo xeito, se a evolución da pandemia é favorable poderían incorporarse novas actividades á oferta deportiva.

Para realizar a matrícula ou obter máis información, os usuarios deben contactar por email con Este enderezo de correo está a ser protexido dos robots de correo lixo. Precisa activar o JavaScript para velo., a través do teléfono 664 076 974 ou 981 811 329 ou dirixirse á Oficina de Deportes Campo do Souto do Centro Social do Concello de Padrón. As prazas das actividades con límite de aforo asignaranse en función da orde de inscrición.

Consulta aquí todas as actividades que se ofertan este curso.