Achégase o final de curso para as persoas que participaron neste curso 2021/2022 nas Aulas Senior de Padrón, xestionadas pola Asociación Cultural Galega da Formación Permanente de Adultos (Ategal) e polo Concello de Padrón. Para celebralo organizouse para o venres 3 de xuño unha tarde de actividades entre as que se encontra a exposición dos traballos realizados, unha conferencia e unha cea de confraternidade á que pode asistir o alumnado.

O acto de clausura comezará ás sete da tarde e levarase a cabo no Auditorio Municipal. Neste recinto inaugurarase a exposición dos traballos realizados durante o curso nos talleres de pintura ao óleo, manualidades e pintura en tela, e lerase a memoria da temporada. O público asistente poderá tamén ver un vídeo resume das accións.

A velada continuará coas intervencións do presidente de Ategal Galicia Aulas Senior, Ángel Fagilde, e do alcalde de Padrón, Antonio Fernández Angueira, que dará paso a unha conferencia da psicóloga María José Fares Varela sobre 'Optimismo e vellez'.

Despois deste evento, a polbeira Lito Mambís acollerá a cea de fin de curso. O prezo por persoa é de 32€ e o menú inclúe empanada, polbo, churrasco, criollos, pan, viño, auga, refrescos, cervexa e tarta larpeira. Para anotarse é preciso acudir ás oficinas das Aulas Senior no Centro Social de Padrón, antes do 30 de maio.

As Aulas Sénior de Padrón retomaron a súa actividade o pasado mes de outubro con 167 persoas matriculadas maiores de 50 anos.  Ademais das xa mencionadas, durante este curso e tras o parón obrigado pola pandemia, o alumnado acode a practicar pilates, ximnasia de mantemento, ioga, taichi, andaina, memoria e a mellorar os coñecementos en informática ou historia da arte, entre outras actividades.