• A Policía Local de Padrón será a encargada de supervisar o seu cumprimento

• As persoas que non respecten as normas de uso dos contedores serán identificadas e sancionadas conforme á normativa vixente

O Concello de Padrón inicia dende hoxe mércores 3 de xullo unha campaña especial de vixilancia do depósito de residuos nos contedores de lixo co obxectivo de promover un entorno máis limpo e respectuoso co medio ambiente.

A medida pretende evitar que a veciñanza deixe bolsas de lixo ou outros residuos fóra dos colectores asignados, o que causa problemas como malos cheiros, dificultade na recollida de lixo e unha mala imaxe do noso pobo.

A Policía Local de Padrón será a encargada de supervisar o cumprimento desta normativa. As persoas que non respecten as normas de uso dos contedores serán identificadas e sancionadas conforme á normativa vixente.

Dende o Concello, faise un chamamento á responsabilidade cidadá para que se empreguen correctamente os distintos tipos de contedores e se realice unha adecuada separación dos residuos. O correcto uso dos colectores é fundamental para manter un Padrón limpo e agradable para a veciñanza e os visitantes.

Esta medida súmase ao resto de iniciativas que está a poñer en marcha o actual goberno municipal de Padrón de acordo ao seu compromiso co desenvolvemento sostible e coa mellora continua da calidade de vida dos seus cidadáns.