• O alcalde, Antonio Fernández, visitou hoxe a zona coa directora xeral de Administración Local //

• Os traballos de soterramento do cableado e os novos pavimentos e luminarias foron financiados cunha achega da Xunta de 38.600 euros //

O alcalde de Padrón, Antonio Fernández Angueira, inspeccionou hoxe as obras de mellora ambiental desenvolvidas no lugar da Ponte na compaña da directora xeral de Administración Local, Natalia Prieto, e que supuxeron un investimento de 38.600 euros aportados pola Xunta de Galicia.

Os traballos dedicáronse á limpeza, á recuperación e ao acondicionamento da contorna da ponte que une Padrón con Pontecesures, xunto a desembocadura do río Ulla. En concreto, grazas a achega da Xunta, soterráronse os cableados de iluminación, construíronse pavimentos exteriores a base de materiais sustentables como a pedra e o terrizo, e instaláronse luminarias de alta eficiencia coa fin de incrementar o aforro enerxético.

Durante a visita, Natalia Prieto subliñou que este tipo de proxectos de recuperación paisaxística teñen un efecto exemplarizante ao contribuír a concienciar tanto á veciñanza como ás entidades locais da necesidade de coidar a contorna. Neste sentido, Antonio Fernández, incidiu en que o Concello de Padrón leva tempo traballando na recuperación da zona da Ponte como un espazo de lecer.