• O alcalde de Padrón e o presidente de Ategal asinaron hoxe o convenio de colaboración para o curso 2022-23 //

• Antonio Fernández destaca a aposta do goberno padronés na formación permanente de persoas maiores de 50 anos e o incremento da achega anual á entidade //

• As Aulas Sénior de Padrón, con 210 alumnos e alumnas, supera en matrícula á das aulas das grandes urbes galegas como Santiago, Vigo, Ourense ou A Coruña //

O alcalde de Padrón, Antonio Fernández Angueira, e o presidente da Asociación Cultural Galega de Formación Permanente de Adultos-Aulas Sénior de Galicia (Ategal), Ángel Fagilde Trabada, veñen de asinar hoxe o convenio de colaboración entre ambas entidades para o desenvolvemento das actividades e programa das Aulas Sénior de Padrón para o presente curso lectivo 2022-23. En virtude deste convenio, o goberno padronés achegará unha contía de 6.300 euros para o desenvolvemento das actividades das Aulas Sénior de Padrón, a cesión das instalacións onde se desenvolve a súa actividade (locais do Centro Social e os pavillóns de deportes municipais) e o persoal necesario para algunhas das actividades e cursos que se celebran na entidade.

Pola súa banda, Ategal comprométese a levar a cabo dende o 17 de outubro de 2022 ata o 31 de xullo de 2023 a ampla oferta lúdico-formativa e de saúde programada neste curso tanto na vila como nas parroquias de Carcacía, Extramundi e no núcleo de Angueira de Suso (A Escravitude), destinadas ao colectivo de maiores de 50 anos, así como o desenvolvemento dos cursos e das accións puntuais ao longo do curso lectivo, como o programa Sumando calidade á vida que comezou o pasado 4 de novembro e que se desenvolvera todos os venres ata o 16 de decembro. Todos os cursos e as actividades de Ategal que se desenvolven en Padrón realízaas a entidade co apoio do Concello.

Na sinatura do convenio de colaboración tamén estiveron presentes a concelleira da Terceira Idade, Lorena Couso; a vicepresidenta de Ategal-Aulas Sénior de Galicia, Paula Sande, e a directora de Ategal-Aulas Sénior de Padrón, Cruz Taboada.

Antonio Fernández subliña que o goberno que preside duplicou este ano a aportación anual a Ategal, consciente do incremento da demanda que están a ter as actividades das Aulas Sénior de Padrón entre o colectivo de persoas maiores de 50 anos. “Este ano facemos unha achega de 6.300 euros, fronte aos 3.000 euros doutras anualidades”, manifesta o alcalde de Padrón, recalcando que “as Aulas non só manteñen neste curso lectivo a súa actividade senón que duplicaron a súa oferta formativa, e, por conseguinte, os seus gastos; de aí que tamén nós incrementemos a achega do Concello”.

O mandatario padronés sinala que tras o parón destes últimos anos derivados das restricións da Covid-19, a matrícula das Aulas Sénior de Padrón incrementouse e hai unha maior demanda. “Os maiores de 50 anos teñen necesidade de recuperar a normalidade, relacionarse, facer exercicio físico, continuar formándose e manterse activos”.

Antonio Fernández Angueira tamén quixo destacar a gran labor que están a realizar as Aulas Sénior de Padrón coas persoas maiores de 50 anos, tanto en Padrón como nas parroquias de Carcacía, Extramundi e A Escravitude (no lugar de Angueira de Suso). E, neste senso, dixo que o obxectivo do Concello non é só manter as actividades destinadas a este colectivo nestes núcleos senón ampliar a oferta lúdico-formativa das Aulas Sénior de Padrón a máis zonas do rural padronés.

Actualmente, as Aulas Sénior de Padrón contan con 210 persoas matriculadas; unha participación moi superior en número de matrícula e tamén no que atinxe á oferta lúdico-formativa á das aulas sénior das grandes urbes galegas como Santiago, A Coruña, Ourense, Vigo ou mesmo Ferrol, o que as converte en todo un referente en Galicia. No primeiro trimestre de 2023, as Aulas Sénior de Padrón cumprirán 30 anos.