Galego
Español 
O goberno local amosou a súa preocupación polo aumento do discurso de odio na lectura do manifesto institucional //
Comprométese a impulsar políticas locais de diversidade encamiñadas á eliminación da LGTBIfobia e a fomentar que todas as persoas poidan vivir sen medos e en liberdade //
O rexedor estivo acompañado polas concelleiras Chus Campos, Mariló Saco, e Laura Horta e polo concelleiro Luis Mariño //
O concerto de tributo a Queen puxo o colofón aos actos do Día do Orgullo LGTBI+ //
O alcalde de Padrón, Anxo Arca, comprométese a impulsar políticas locais que eliminen a LGTBIfobia e a fomentar que todas as persoas poidan vivir sen medo durante a lectura do manifesto institucional ‘Padrón con Orgullo’. Coa declaración institucional e un concerto de tributo a Queen, o Concello pechou o pasado venres os atos oficiais para conmemorar o Día do Orgullo LGTBI+, que se celebra cada 28 de xuño.
Anxo Arca, acompañado polos concelleiros e concelleiras Chus Campos, Mariló Saco, Laura Horta e Luis Mariño, recordou durante a lectura do manifesto institucional que o Día do Orgullo é unha data “para celebrar pero tamén para reivindicar” e amosou a súa preocupación polo aumento do discurso de odio.
O goberno local insistiu na condena de calquera discriminación contra gais, lesbianas, bisexuais, persoas trans, intersexuais e demais membros do colectivo.
“Recoñecemos o traballo de todas as persoas activistas LGTBI+, apoiando as súas accións a prol da defensa da igualdade e a loita contra a discriminación”, subliñaron no manifesto ao tempo que prometeron “impulsar políticas locais de diversidade encamiñadas á eliminación da LGTBIfobia e a fomentar así que todas as persoas poidamos vivir sen medos e en liberdade”
Despois da lectura do manifesto institucional, a praza Rodríguez Cobián acolleu tamén o concerto tributo a Freddie Mercury por parte da banda Bulsara.
