A concelleira Mariló Saco participou e directivos de AMIPA participaron nesta primeira sesión ||

A obra de lectura fácil ‘Marcus Marc y la ruta del cacao’ será a primeira que se comentará este curso ||

O proxecto Libros Viaxeiros, da Oficina Municipal de Padrón, iniciou unha nova andaina este mércores 27 de setembro cunha actividade centrada no cacao e o comercio xusto, que tiña como obxectivo facer un achegamento á temática da primeira novela que se vai comentar. Trátase da obra de lectura fácil Marcus Marc y la ruta del cacao, de Nuria Martí Constans, publicada pola editorial Adapta.

Coa presenza da concelleira de Xuventude e Voluntariado, Mariló Saco, e unha vintena de participantes, entre os que se contan membros da Asociación AMIPA, persoas voluntarias e público interesado, a iniciativa Libros Viaxeiros comezou o novo curso cun taller sobre Cacao e comercio xusto impartido por persoal da ONG Solidariedade Internacional. O obradoiro serviu para que os asistentes puideran saber máis sobre a orixe, a produción os tipos ou a comercialización do cacao. Así mesmo, desfrutaron dunha cata a cegas de distintas variedades de chocolate.

O presidente da Asociación AMIPA, José Rodríguez; a xerenta, Begoña Suárez; e a educadora Sonia Paz contáronse entre as persoas asistentes.