O alcalde de Padrón, Anxo Arca, e o presidente da Deputación da Coruña, Valentín González Formoso, analizaron os futuros proxectos nos que o goberno local confía en contar co apoio da institución provincial. Na que supón a primeira visita institucional ao Concello nesta lexislatura, o rexedor local e o presidente provincial abordaron entre outros temas a creación de novas infraestruturas deportivas urbanas como un parque de skate e calistenia.

Arca insistiu en que "o noso municipio ten unhas necesidades que a Deputación ten en conta, investindo unha cantidade importante nos últimos anos" e puxo en valor esta reunión "para falar das necesidades de Padrón e de como podemos mellorar o noso concello no futuro". “Agradecémoslle ao presidente da Deputación a súa presenza en Padrón, que se preocupase por vir á capital do Sar e por ter conta cales son as nosas necesidades despois dunha etapa de doce anos de goberno do Partido Popular que non abordou todas as necesidades do municipio”, engadiu.

“Dende agora xa nos poñemos a traballar para executar estes proxectos canto antes e esperamos contar no sucesivo coa colaboración da Deputación para levar a práctica todas as melloras e as novas instalacións que precisan os nosos veciños e veciñas, especialmente os máis mozos”, subliñou o alcalde. 

Trala recepción oficial na casa consistorial, o alcalde Anxo Arca acompañou o presidente da Deputación á Casa Museo de Rosalía, sede da Fundación Rosalía de Castro, nunha visita na que tamén participou o presidente da entidade, Anxo Angueira. 

O alcalde aproveitou para agradecerlle ao presidente provincial "a súa implicación, ampliando a colaboración da Deputación da Coruña ata o ámbito cultural, a través do proxecto de mellora dos xardíns, que forman parte dun dos edificios con maior valor patrimonial do Concello de Padrón" cun investimento próximo aos 60.000 euros.

Por último, Formoso e Rei visitaron tamén a sede da cooperativa xuvenil Moira, creada por cinco mozas e premiada conxuntamente pola Deputación e pola Fundación Paideia.