O alcalde de Padrón realizou a ofrenda a Santiago nunha cerimonia da Traslatio presidida por monseñor Julián Barrio  ||  

Pediu máis solidariedade e respecto a todas as persoas e lembrou a quen sofre as consecuencias da guerra de Palestina  ||   

O acto, que conta con carácter oficial dende 1646, conmemora o traslado dos restos do Apóstolo dende Palestina a Iria Flavia  ||  

O alcalde de Padrón, Anxo Arca, renovou hoxe os votos da vila padronesa co Apóstolo na tradicional cerimonia da Traslatio coa que se conmemora o traslado do corpo de Santiago o Maior dende Palestina ata o porto da antiga cidade de Iria Flavia. O rexedor padronés solicitou a intercesión do Apóstolo para lograr que, por riba de ideoloxías e intereses particulares, se impoñan o diálogo e a colaboración de cara a lograr o desenvolvemento e benestar dos pobos.

“Pensar na traslatio lévame, tamén, de xeito obrigado, a pensar en Palestina, e en todas as persoas que hoxe sofren as consecuencias dunha guerra cun innegable trasfondo relixioso que está a causar innumerables mortes, destrución e sufrimento”, afirmou Anxo Arca.

“Pídolle hoxe ao Apóstolo que sexamos máis solidarios e loitemos xuntos polo respecto a todas as persoas: que poidamos poñerlle fin á violencia machista, que atopemos as fórmulas para apoiar e integrar os colectivos máis desfavorecidos, que contemos todos coas mesmas oportunidades independentemente da nosa orixe e condición, que coidemos dos nosos maiores”, sinalou Anxo Arca.

O rexedor padronés aproveitou tamén a súa invocación para reivindicar o papel de Padrón como berce da tradición xacobea e subliñou que cada día son máis os peregrinos que se achegan á capital do Sar, non só a través do Camiño Portugués senón tamén como destino en si mesmo. Recordou neste sentido que durante este ano 2023 se repartiron máis de 20.000 pedronías, o certificado que acredita a continuación da peregrinación ata Padrón logo de visitar os restos do  Apóstolo.

Anxo Arca confesouse emocionado de vivir como alcalde a súa primeira Traslación, perpetuando unha tradición que se oficiliazou no ano 1646, pero que xa se viña desenvolvendo con anterioridade tal e como está documentado dende 1588. 

A orixe, con todo, remóntase aos principios do cristianismo hai dous mil anos cando os discípulos do Apóstolo Santiago decidiron salvar o seu corpo decapitado embarcándoo nunha das numerosas naves que dende Haffa, en Palestina, surcaban o Mediterráneo. Foi así como, remontando o que hoxe é Portugal, acabaron por chegar ao antigo porto de Iria Flavia. Alí amarraron a barca a unha ara romana ou pedrón que lle deu nome á poboación padronesa e que aínda se conserva na igrexa de Santiago.

Malia que o pedrón está sempre exposto na igrexa parroquial de Padrón, este 30 de decembro, coincidindo coa conmemoración da Traslatio, permíteselles acceder á cámara na que se atopa a padroneses e visitantes.

O acto relixioso desta Traslatio, que dou comezo ás 20.00 horas na igrexa parroquial de Santiago, foi presidido polo arcebispo emérito de Santiago, monseñor Julián Barrio, e concelebrado polo párroco de Padrón, Roberto Martínez, e outros sacerdotes. Contou coa presenza do presidente da Academia Xacobea, Xesús Palmou; do alcalde de Dodro, Xabier Castro, de membros do goberno padronés e do presidente da Fundación Ruta Marítima Xacobea do Mar de Arousa e Ulla, Javier Sánchez-Agustino. A Banda Municipal de Música de Padrón pechou o acto interpretando dúas panxoliñas.

Máis fotos na páxina de Facebook do Concello de Padrón (neste enlace)