• A iniciativa está dirixida a nenos e nenas de 3 a 16 anos e desenvolverase durante os meses de xullo e agosto

• Inclúe actividades educativas, lúdicas e saídas, favorecendo a conciliación das familias no período estival

O Concello de Padrón abrirá o vindeiro luns 4 de maio o prazo de inscrición para participar no programa Concilia Verán 2026, unha iniciativa dirixida a facilitar a conciliación da vida familiar e laboral durante o período estival.

A actividade desenvolverase no CEIP Flavia e está destinada a nenos e nenas de entre 3 e 16 anos, cun horario de 7.45 a 15.15 horas, adaptado ás necesidades das familias.

O programa estrutúrase en tres quendas: a primeira do 1 ao 15 de xullo e a segunda do 16 ao 31 de xullo, ambas con 55 prazas; e unha terceira quenda do 1 ao 14 de agosto, con 15 prazas. O custo por participante será de 60 euros por quenda.

O prazo para formalizar a inscrición permanecerá aberto entre o 4 e o 11 de maio, podendo realizarse no edificio de Servizos Sociais.

O Concilia Verán ofrecerá unha programación variada que combina contidos educativos con propostas de lecer, co obxectivo de promover a aprendizaxe a través da experiencia e o xogo. Entre as actividades previstas inclúense excursións á praia e á piscina con transporte, festas da espuma, festas holi, xornadas con inchables de auga, unha noitada nocturna e diversos obradoiros creativos con material incluído.

As solicitudes deberán presentarse no Rexistro do Concello de Padrón ou a través da sede electrónica municipal, empregando o modelo específico. Para máis información, as persoas interesadas poden dirixirse aos Servizos Sociais municipais ou contactar no teléfono 981 81 70 25.

Desde o Concello de Padrón destácase a importancia deste programa como ferramenta de apoio ás familias, ao tempo que se ofrece á infancia unha alternativa de lecer educativo, segura e de calidade durante as vacacións de verán.